Die Bewonerskomitee wil al die personeel en inwoners voorspoed toewens vir die nuwe jaar.  

Ons het darem die nuwe jaar goed begin met die heerlike reën wat ons gehad het.  Ons wil graag vir Sieg bedank vir die statistieke van die reënval wat hy op die prikbord aanbring.  Die inwoners kan gerus op die prikbord gaan loer. Dis baie interessant! !

Elke, die voorsitster van die biblioteekkomitee, het verslag gedoen van hul werksaamhede.  Die inwoners word weer daaraan herinner dat, as `n boek teruggebring word, die boek nie self op die rak teruggeplaas moet word nie maar op die tafeltjie neergesit moet word.  Daar is nuwe groot-druk boeke aangekoop, dus kan daar weer lekker gelees word.  Graag word u daaraan herinner dat die koerante nie uit die biblioteek verwyder mag word nie.

Daar was navraag i v m die  persoonlike gegewens wat die versorging aan ons besorg het. Die gegewens van ons naasbestaandes moet in ons woning aangebring word.  Antoinette sal ons laat weet waar die inligting aangebring moet word.

Die parkering van besoekers bly `n groot probleem by die afdakke aan die westekant.  Daar is al herhaaldelik daaroor gekommunikeer sonder resultate.  Daar gaan nou drastiese stappe geneem word as daar onwettig parkeer word. Besoekers mag steeds iets oplaai en aflaai maar moet dan vertrek en op die parkeerarea voor die saal parkeer.  As daar onwettig parkeer word gaan daar in die toekoms `n foto van die nommerplaat van die besoeker se motor geneem word. Die inwoner, wie se besoeker dit is, gaan die einde van die maand as hul, hul maandstaat ontvang, nie gelukkig wees nie as die inwoner sien `n boete is gehef! ! ! Waarsku asseblief die besoeker!

Die Bestuur en die betrokke dames word weereens hartlik bedank vir al die moeite en die heerlike Kersete. Dit was `n ware fees !  Ons almal het die ete so waardeer en ons sien uit na die volgende Kersete.

Jammer inwoners ! !   Die geheimsinnige daggaplant is verwyder.  (Dus die  plan om daggakoekies vir die koffie-oggend te bak is verby.  Ons almal sou so vrolik gewees het.)

Soos sommige reeds opgemerk het, het ons weer ‘n kat met sommer vyf kleintjies. Die komitee het `n lang bespreking hieroor gehad, met verskillende menings.  Aangesien daar heelwat klagtes oor rotte en muise op die terrein is, is besluit om die kat te laat steriliseer om sodoende te probeer om die muise en rotte te beheer.  (Ek hoop net die Dikkoppe  gaan veilig wees.)

Inwoners, wat gereeld die lapa besoek, sal weet dat die meubels onder die afdak al beter dae geken het. Antoinette het voorgestel dat die meubels vervang moet word. Wat `n  goeie plan is.  Die Bewonerskomitee is bereid om hul deel by te dra.  Heelwat besoekers maak gebruik van “Benniebraai”.  Ons wil darem trots wees ! !

Aangesien Cor Beek, die redakteur van die Bulletin, na baie jare ons gaan groet, is ons dringend opsoek na `n persoon wat die takie kan oorneem.   Antoinetta is bereid om as redaktrise op te tree met die hulp van `n buite persoon waarvoor ons dan moet betaal.  Baie dankie Antoinetta, ons hoop ons gaan iemand vind!  Cor, namens al die inwoners wil ons jou bedank vir al die jare se ywer en harde werk!  Ons weet dit was nie altyd maklik nie.  Soms was jy maar “kwaai”  as ons nie die sperdatum haal nie, maar  ons het verstaan ! ! !

Gedurende die feesgety, terwyl hier  minimum werkers was, het ons `n baie groot waterlek gehad. (Dieselfde pyp het drie keer begin lek.)  Sodoende moes die boorgat afgeskakel word.  Gelukkig het ons baie reën gehad.  Dunani het tot ons redding gekom. Die derde keer toe die pyp weer lek het Antoinette ingespring en raad gegee. (Ek het nie geweet Antoinette is so tegnies nie.) Sy het net Dunani opdrag gegee:  “Gaan nou Mica toe en koop heavy duty clamps  en kry `n nuwe pyp.”  Een, twee, drie en die probleem is opgelos!

Baie groete

Nelke Ribberink